NAG-UWI ng apat na gintong medalya ang Philippine Boxing Team sa magkahiwalay na torneo sa Serbia at Netherlands sa ilalim ng pangangasiwa ng Association of Boxing Alliances in the Philippines (ABAP).

Pinangunahan nina Clark Vicera at veteran Riza Pasuit ang kampanya ng bansa sa 63rd Belgrade Winner Elite Men’s and Women’s Boxing Tournament na ginanap sa Serbia.

Nasungkit ni Vicera ang gintong medalya sa men’s 50-kilogram division matapos talunin sa unanimous decision si 2024 Youth World Boxing Championships bronze medalist Dias Berikbay ng Kazakhstan sa preliminary round.

Sinundan niya ito ng panalo laban kina Ibrahim Aljohani ng Saudi Arabia sa quarterfinals at Nurzat Ongarov ng Kazakhstan sa semifinals bago tinalo si Salih Samet Oruc ng Türkiye sa pamamagitan ng 4-1 split decision sa finals.

Dominante rin si Pasuit sa women’s 57kg division matapos walisin ang lahat ng kanyang laban sa pamamagitan ng unanimous decision victories kontra Victoria Vergos ng Canada, Areti Stergiou ng Greece, at Ece Asude Ediz ng Türkiye.

Nag-ambag din si Paul Julyfer Bascon ng tansong medalya sa men’s 60kg category.

Matapos ang torneo sa Serbia ay nagtungo naman ang koponan sa Netherlands para sa Eindhoven Box Cup kung saan muling nagningning si Vicera.

Tinalo niya si Sameer Ardawan ng Belgium sa semifinals at si Ruslan Bednychenko ng Ukraine sa finals sa pamamagitan ng unanimous decision victories.

Bagama’t natalo sa unang round ng finals, nakabawi si Vicera sa sumunod na dalawang rounds upang masungkit ang panalo.

Nagdagdag pa ng gintong medalya si Tokyo Olympics silver medalist Carlo Paalam matapos maghari sa men’s 55kg division.

Hindi nakasama si Paalam sa torneo sa Serbia dahil sa karamdaman ngunit bumawi ito sa Netherlands sa impresibong kampanya.

Binuksan niya ang torneo sa dominanteng 5-0 panalo laban kay Justin Sahin ng Germany sa quarterfinals bago ginapi si Paris 2024 Olympic silver medalist Billal Bennama ng France sa pamamagitan ng 4-1 split decision sa semifinals.

Tinapos niya ang kanyang kampanya sa pamamagitan ng unanimous decision victory laban kay Abdul Burton ng England sa finals.

Kasama rin ng koponan sina ABAP coaches Ronald Chavez, Elmer Pamisa, at Mario Fernandez, physical therapist David Abraham Giray, at ABAP president Marcus Manalo.

“We’re happy to bring home four gold medals from two high-caliber tournaments,” ani ABAP President Marcus Manalo. “However, more than the medals, we’re really happy with the performance of our boxers. They showed skill and determination in every match, as well as their fighting spirit when things got difficult against really good opponents. This is a sign that we’re heading in the right direction as we look forward to the upcoming Asian Games in September.”