PATAY ang isang estudyante makaraang bumangga ang minamanehong motorsiklo nito sa isang Sports Utility Vehicle sa Barangay San Fabian, Echague, Isabela.

Kinilala ang biktima na si Mark Anthony Bermudez, 23, at residente ng Barangay Gumabauan. Nakatakda siyang magtapos sa kolehiyo sa Hulyo ngayong taon.

Ang drayber ng SUV ay kinilalang si Larry Binuya, 48.

Batay sa imbestigasyon ng Echague police station, tinatahak ng biktima ang nasabing kalsada at papaliko naman ang SUV kaya nagsalpukan ang mga ito.

Dahil sa lakas ng impact ay nagtamo ng sugat sa iba’t ibang bahagi ng katawan ang estudyante na naisugod pa sa pagamutan subalit idineklarang dead on arrival ng doctor.

Nagkaayos naman ang magkabilang panig at hindi na magsasampa ng kaso ang pamilya ng estudyanteng nasawi.