BUMANGON mula sa mabagal na simula ang University of the Philippines Fighting Maroons upang gapiin ang University of the East Red Warriors, 91-81, sa UAAP Season 89 men’s basketball tournament kahapon sa UST Quadricentennial Pavilion sa Manila.

Kumamada si James Payosing ng 16 puntos upang pangunahan ang Fighting Maroons na umangat sa 5-2 kartada at inangkin ang solong liderato.

Naghahabol sa unang bahagi ng laro ang UP bago bumanat si Chicco Briones ng tatlong sunod na three-pointer, habang nagdagdag ng mga krusyal na free throws si Elliot Dimaculangan upang itayo ang 73-65 kalamangan ng Fighting Maroons.

Hindi agad sumuko ang Red Warriors at muling lumapit sa 70-74, ngunit sumagot sina Payosing at Dikachi Udodo ng mga krusyal na basket upang tuluyang maikandado ng UP ang panalo.

Nagtapos si Briones na may 13 puntos, habang may tig-11 puntos sina Dimaculangan at Veejay Pre. Nag-ambag naman ng tig-10 puntos sina Udodo at Rey Remogat para sa Fighting Maroons.

Nanguna sa UE si Toper Lagat na kumana ng 26 puntos. Nagdagdag si Mo Tanedo ng 14 puntos, habang nagtala si Cole Cruz-Dumont ng 10. Nanatiling walang panalo ang Red Warriors sa pitong laban.