DUMATING sa Maynila ang mga magulang ng yumaong Ateneo de Manila University student-athlete na si Divine Adili upang saksihan ang unang dalawang laro ng Blue Eagles sa UAAP Season 89.

Nakatakdang manood ang pamilya Adili sa laban ng Ateneo kontra University of the East sa Setyembre 16 at sa kanilang kasunod na laro kontra University of the Philippines sa Setyembre 19.

Ito ang unang pagbisita ng mga magulang ni Divine sa Pilipinas, ayon sa Ateneo, na mainit na tinanggap sa komunidad ng unibersidad.

Sa kanilang pagbisita, makakasama nila ang mga manlalaro ng Ateneo men’s basketball team at iba pang miyembro ng komunidad sa mga susunod na araw.

Mahalaga ang pagdating ng pamilya Adili habang iniaalay ng Blue Eagles ang kanilang Season 89 campaign sa alaala nina Divine at Rene Clert “Bobet” Baterbonia.

Kapwa nasawi ang dalawang student-athletes noong Hunyo 8 sa isang insidente ng pagkalunod habang nagsasagawa ng team-building activity sa Dipaculao, Aurora.

Ayon sa Ateneo, pagkakataon ang pagbisita para muling makasama ng mga magulang ni Divine ang mga dating kakampi, kaibigan at miyembro ng komunidad na naging bahagi ng buhay ng kanilang anak.

Hiniling din ng unibersidad sa komunidad na tanggapin ang pamilya Adili nang may malasakit at paggalang, habang binibigyan sila ng sapat na pribadong oras at espasyo upang makapagluksa.

Umaasa ang Ateneo na magiging makabuluhan ang pagbisita ng pamilya at magsilbing pagkakataon upang maalaala si Divine sa pamamagitan ng mga taong nakakilala, nakasama at nagmalasakit sa kanya.