ISINUSULONG ng Lanao del Norte ang posibilidad na magkaroon ng satellite campus ng National Academy of Sports (NAS) sa Mindanao Civic Center (MCC) sa Tubod upang mapalawak ang oportunidad sa pagsasanay at edukasyon para sa mga batang atleta sa rehiyon.

Bumisita sa NAS campus sa New Clark City sina Lanao del Norte Rep. Imelda Quibranza-Dimaporo at Provincial Administrator Lyndon Calica upang tingnan ang mga pasilidad at dormitoryo ng akademya na maaaring magsilbing modelo sa planong pasilidad sa MCC.

Pinangunahan ni Philippine Sports Commission Chairman Patrick Gregorio ang paglilibot sa mga opisyal ng lalawigan.

“The NAS is designed to nurture the finest grassroots athletes and prepare them to become medal-winning national athletes. Replicating such a facility in Mindanao will give young athletes from the region the same opportunities to reach their dreams without having to leave home too early,” ani Gregorio.

Nakatuon ang NAS sa pagtuklas at paghubog sa mga batang atleta habang binibigyan sila ng pagkakataong pagsabayin ang pag-aaral at mataas na antas ng pagsasanay sa kanilang napiling isport.

Ayon kay Quibranza-Dimaporo, malaking tulong sa mga batang atleta sa Mindanao ang pagkakaroon ng NAS satellite campus sa Tubod dahil hindi na nila kailangang lumuwas agad sa Luzon upang maipagpatuloy ang kanilang sports at academic development.

“A satellite NAS campus at the Mindanao Civic Center will be a game-changer for our youth. It will open doors for Mindanao athletes to train, study, and dream of representing the country in international competitions,” ani Quibranza-Dimaporo.

“This is about giving them hope and a clear pathway to success,” dagdag niya.

Sinamahan naman ni NAS Deputy Executive Director Emil Arroyo ang delegasyon sa kanilang paglilibot sa pasilidad.

Bukod sa planong NAS satellite campus, naghahanda rin ang Lanao del Norte para sa 1st Mindanao Youth Games na gaganapin sa MCC mula Abril 11 hanggang 17, 2027.

Kinumpirma ni Calica na inaasahang lalahok sa torneo ang libo-libong atleta na may edad 18 pababa mula sa 33 lungsod sa anim na rehiyon ng Mindanao. Lalahok  din ang Timor-Leste bilang guest delegation.

Nakatakdang magkaroon ng kompetisyon sa 12 hanggang 15 sports, kabilang ang athletics, football, swimming, basketball, volleyball, archery, tennis, combat sports at weightlifting.

“The Mindanao Youth Games will showcase the best of our young athletes and position Lanao del Norte as a hub for sports tourism. Hosting this event is not just about competition, it is about peace, development, and giving our youth a platform to shine,” ani Calica.

May lawak na 66 ektarya ang MCC at mayroon nang mga pasilidad para sa iba’t ibang pangunahing sports.

Kabilang dito ang FIFA-certified football field at World Athletics-standard track and field oval, gayundin ang Olympic-size swimming pool at 25-meter training pool.

May 5,000-seat gymnasium din ang complex na ginagamit para sa basketball at volleyball, habang mayroon ding pasilidad para sa archery, tennis, combat sports at weightlifting.

Nauna nang pinuri ni Gregorio ang sports complex sa isinagawang Lanao del Norte Sports and Youth Summit sa Tubod.

“I think you have the best sports facilities in the country. Maybe you don’t realize it, but it is really world-class,” pahayag ni Gregorio kay Quibranza-Dimaporo.