MALAYO  na ang narating ni Alexandra Eala kumpara noong nakaraang taon matapos ang sunod-sunod na malalaking panalo at mabilis na pag-akyat sa world rankings.

Sinabi ng Filipina tennis star na naging malaking bahagi ng kanyang pag-angat ang karanasan sa pakikipagsabayan sa ilan sa pinakamahuhusay na manlalaro sa mundo.

“I think I’ve experienced so much growth in the past year and so many milestones in my career,” pahayag ni Eala sa kanyang pre-tournament press conference. “I think there’s so many lessons. I’ve gotten to work closely with so many amazing tennis players.”

Noong 2025 US Open, nasa No. 75 lamang sa world rankings si Eala. Doon niya isinulat ang kasaysayan nang talunin si Clara Tauson sa isang matinding three-set match para maging kauna-unahang Pilipina sa Open Era na nanalo ng singles match sa isang Grand Slam.

Mula noon ay tuloy-tuloy na ang pag-angat ng 21-anyos na si Eala at nitong nakaraang linggo ay umabot siya sa career-high No. 18 sa WTA rankings. Sa kasalukuyang US Open, siya ay nakakuha ng No. 17 seeding.

Hindi lamang rankings ang naging sukatan ng kanyang pag-unlad.

Ngayong taon, nakapagtala si Eala ng malalaking panalo laban sa mga nangungunang manlalaro, kabilang sina Coco Gauff sa Indian Wells, Elena Rybakina at Elina Svitolina sa Berlin, at Iga Swiatek sa Wimbledon.

Lalong naging kapansin-pansin ang kanyang kampanya sa Mubadala DC Open, kung saan tinalo niya si Svitolina sa quarterfinals bago dinispatsa si Jessica Pegula sa championship match para makuha ang kanyang unang WTA 500 title.

Sa kabuuan, siyam na ang panalo ni Eala laban sa Top 10 players mula nang makopo niya ang kanyang unang panalo sa 2025 Miami Open.

Ayon kay Eala, nakatulong nang malaki ang madalas na pakikipaglaban sa mga nangungunang manlalaro upang mas maunawaan niya ang kanilang paghahanda at diskarte sa kompetisyon.

“I’ve gotten to experience more of their work ethic, obviously being in this environment a lot more. And I’ve gotten to compete against the best of the best a lot more frequently,” aniya.

May espesyal ding alaala si Eala sa Flushing Meadows matapos ang kanyang matagumpay na debut doon noong nakaraang taon, kung saan naglaro siya sa harap ng isang masiglang manonood.

“I think that I’m lucky enough to have experienced so many matches such as that one in the US Open last year where the court was packed and the atmosphere was amazing against very formidable opponents,” aniya.

Sa kanyang pagbabalik sa New York, haharapin ni Eala ang American qualifier na si Mary Stoiana, na kasalukuyang No. 122 sa mundo, sa Miyerkoles ng umaga.

Mas mataas man ngayon ang inaasahan sa kanya, dala ni Eala sa US Open ang mas malawak na karanasan, mas mataas na ranking at kumpiyansang bunga ng malalaking panalo ngayong taon.