MATINDING paghahabol ang ginawa ng Adamson University Lady Falcons para pataubin ang University of Santo Tomas Golden Tigresses, 22-25, 25-19, 16-25, 27-25, 15-12, sa Game 1 ng V-League 2026 Collegiate Challenge Finals kagabi sa Playtime FilOil Centre sa San Juan.

Natisod agad ang Adamson sa first set ngunit mabilis na nakabawi sa ikalawa. Muling nakalamang ang UST sa third set bago nagpakita ng tibay ang Lady Falcons sa fourth set at nakipagsabayan hanggang sa makuha ang 27-25 panalo.

Nagpalitan ng kalamangan ang dalawang koponan sa deciding fifth set bago tuluyang kumawala ang Adamson para tapusin ang laban, 15-12, at kunin  ang 1-0 bentahe sa best-of-three championship series.

Nanguna si Frances Mordi para sa Lady Falcons at kinilala bilang Player of the Game sa kanyang malaking ambag sa comeback victory.

Nagpasiklab din sina Joy Aseo, Lana Barrera at Fhei Sagaysay upang tulungan ang Lady Falcons na makumpleto ang pagbawi kahit na hindi nakapaglaro si star hitter Shaina Nitura.

Isang panalo na lamang ang kailangan ng Adamson upang maidepensa ang titulo nito sa Game 2 na nakatakda ngayong weekend.

Samantala, tinapos ng University of the East Lady Warriors ang kanilang kampanya sa torneo sa pamamagitan ng straight-set victory kontra Arellano University Lady Chiefs, 25-23, 25-22, 28-26, upang makuha ang bronze medal.

Naging sandigan ng UE si Janessa Buhay matapos magtala ng 27 puntos mula sa 25 attacks at dalawang aces. Nagdagdag din siya ng 17 excellent receptions sa loob ng isang oras at 37 minutong laban.

Nag-ambag naman si Van Bangayan ng 21 puntos mula sa 19 attacks at dalawang aces, habang pinatatag ni team captain at libero Angge Reyes ang depensa ng Lady Warriors sa kanyang 27 excellent sets at 14 excellent receptions. May 16 excellent sets naman si Jennel Arasan para sa UE.