NABIGO ang Alas Pilipinas Women na makaabante sa quarterfinals ng 2026 Asian Games matapos kapusin laban sa Kazakhstan, 29-27, 24-26, 23-25, 19-25, kahapon sa Okazaki Central Park General Gymnasium sa Aichi, Japan.

Nakuha ng pambansang koponan ang first set sa isang dikit na laban, ngunit hindi na nito napigilan ang Kazakhstan na makabawi at dominahin ang sumunod na tatlong set upang masungkit ang panalo.

Matapos ang 29-27 panalo sa opening frame ay nakipagsabayan ang Alas sa second set at sinubukang makuha ang kontrol sa laro. Gayunman, naging mas matatag ang Kazakhstan sa mga huling palitan at naagaw ang set para itabla ang laban.

Nagpatuloy ang matinding bakbakan sa third set, ngunit muling nabigo ang mga Pinay na maisara ang laban sa mga krusyal na sandali. Nakuha ng Kazakhs ang 25-23 panalo upang makalamang, 2-1.

Sa fourth set, nakahanap ng pagkakataon ang Kazakhstan na tuluyang kumawala matapos ang sunod-sunod na errors ng Alas. Umabot sa 18-12 ang kanilang kalamangan, na naging daan upang makontrol ang laro.

Sinubukan pang bumawi ng Pilipinas, ngunit hindi nito napigilan ang Kazakhstan na tapusin ang laban at makuha ang panalo.

Muling pinangunahan ni Angel Canino ang opensiba ng Alas matapos magtala ng game-high na 24 puntos.

Nag-ambag naman si Alyssa Solomon ng 20 puntos, habang nagtala si Eya Laure ng pito. May tig-aapat na puntos sina Bella Belen, Dell Palomata, Thea Gagate at Amie Provido.

Pinangunahan ni Tatyana Nikitina ang Kazakhstan sa kanyang 19 puntos, sinundan ni Zhanna Syroyeshkina na may 17. Nagdagdag sina Polina Ufimtseva at Kristina Belova ng 14 at 12 puntos, ayon sa pagkakasunod.

Sa pagkatalo, bumagsak ang  Alas Women sa classification round.