TATLONG pasabog na collegiate volleyball stars ang mangunguna sa 16-player Alas Pilipinas national women’s volleyball team na sasabak sa AVC Women’s Volleyball Nations Cup ngayong buwan sa Vietnam.

Sina Angel Anne Canino, Mhicaela Belen, at Shaina Nitura ang natapik na manguna sa opensa ng national women’s volleyball team ni head coach Jorge Edson Souza de Brito.

Bukod sa tatlong kamador, kasama rin sa roster ng pambansang koponan ang PVL stars na sina Eya Laure, Vanessa Gandler, at Leila Cruz at si two-time UAAP best opposite spiker Alyssa Solomon.

Kinuha naman na setter sina Julia Morado-de Guzman, Julia Coronel, at reigning UAAP Best Setter Camille Lamina, habang sina Dawn Macandili-Catindig at Jennifer Nierva ang bibida sa depensa bilang libero.

Bubuo sa middle blocker position sina PVL Press Corps Rookie of the Year Thea Gagate, Mereophe Sharma, Dell Palomata, at Clarisse Loresco.

Ang Nations Cup ang isa sa mga kompetisyon na lalahukan ng Alas Pilipinas bilang preparasyon para sa 33rd Southeast Asian (SEA) Games sa Thailand ngayong Disyembre.