Dead on the spot ang direktor ng Bataan Peninsula State University nang sumalpok ang kanyang sinasakyang sports utility vehicle sa kumakaliwang dump truck nitong Huwebes ng gabi sa Roman Expressway sa Barangay Laon, Abucay, Bataan.

Nayupi ang SUV na may plakang WNH-752 na minamaneho ng 37-anyos na si Jose Paulo Tuazon.

Sa imbestigasyon ng pulisya, hindi na nakapagpreno ang biktima sa kanyang minamanehong Toyota Revo makaraang mabulaga sa truck na may plakang TQU-224 at minamaneho ng isang Alvin de Leon.

Galing umano sa isang birthday party ang biktima sa BPSU Abucay at pauwi na sa Balanga City nang maganap ang aksidente.

Si Tuazon ay kasalukuyang director ng Auxilliary and Entrepreneurial Services ng unibersidad.

Nasa kustodiya na ng pulisya ang driver ng trak.