BIBIGYANG-PUGAY ng Collegiate Press Corps (CPC) ang apat na coach na naghatid ng kampeonato sa kani-kanilang koponan sa UAAP at NCAA sa gaganaping Awards Night na inihahandog ng Strong Group Athletics sa Hunyo 29 sa Discovery Suites Manila sa Pasig City.

Tatanggap ng pinakamataas na pagkilala sina De La Salle University coach Ramil de Jesus, Colegio de San Juan de Letran mentor Mayeth Carolino, National University tactician Dante Alinsunurin, at De La Salle-College of Saint Benilde head coach Arnold Laniog matapos gabayan ang kani-kanilang mga koponan sa kampeonato ngayong taon.

Kinilala si De Jesus bilang UAAP Women’s Volleyball Coach of the Year matapos pangunahan ang La Salle Lady Spikers sa perpektong kampanya sa Season 88. Winalis ng Lady Spikers ang lahat ng kanilang 16 na laro, kabilang ang panalo laban sa National University sa Finals, upang masungkit ang ika-13 kampeonato ng paaralan sa women’s volleyball.

Ang kanilang walang bahid na kampanya ay itinuturing na isa sa pinakamakapangyarihang performance sa kasaysayan ng liga na nagbalik ng korona sa Taft Avenue.

Samantala, napili si Carolino bilang NCAA Women’s Volleyball Coach of the Year matapos ihatid ang Letran Lady Knights sa kampeonato ng Season 101. Matagumpay niyang naibalik sa tuktok ang programa ng Letran matapos pabagsakin ang defending champion College of Saint Benilde sa Finals.

Dating bahagi ng mga nagkampeong koponan ng Letran noong dekada 90, pinatingkad pa ni Carolino ang kanyang makulay na karera sa pamamagitan ng isa pang titulo bilang head coach.

Sa men’s division, tatanggapin ni Alinsunurin ang UAAP Men’s Volleyball Coach of the Year award matapos muling pangunahan ang National University Bulldogs sa kampeonato. Tinalo ng NU ang Far Eastern University sa Finals upang makuha ang kanilang ikaanim na sunod na titulo.

Ito rin ang ika-walong kampeonato ng Bulldogs sa loob ng kanilang kahanga-hangang sunod-sunod na 11 Finals appearances.

Kikilalanin naman si Laniog bilang NCAA Men’s Volleyball Coach of the Year matapos gabayan ang Benilde Blazing Spikers sa kampeonato ng Season 101. Natuldukan ng titulo ang siyam na taong paghihintay ng programa para sa isa pang korona.

Dating manlalaro at matagal nang bahagi ng Benilde program, matagumpay na naibalik ni Laniog ang Blazing Spikers sa hanay ng mga pinakamahusay na koponan sa collegiate men’s volleyball.

Ang taunang parangal ng CPC ay suportado ng Philippine Sports Commission, San Miguel Corporation, Converge FiberX, Go For Gold, D’Generals, Buffalos’ Wings N’ Things, at Discovery Suites Manila.