PINANGUNAHAN ng Technical Education and Skills Development Authority ang tatlong araw na pagsusuri sa Photovoltaic  System Installation Training sa Bureau of Jail Management and Penology (BJMP) – Romblon District Jail.

Layunin ng programa na tasahin at kumpirmahin ang kakayahan ng 25 Persons Deprived of Liberty sa pag-iinstall ng PV systems at bibigyan sila ng sertipikasyon.

Ayon kay Jail Officer 3 Joefrie Anglo, Information Officer ng BJMP Mimaropa, ang assessment ay ginagampanan ng mga TESDA-accredited engineer. Itinampok sa unang araw ang teoretikal na bahagi, kabilang ang mahahalagang safety protocols, kung saan buong sipag na nakibahagi ang lahat ng kalahok.

Sa mga susunod na araw, tututukan ang praktikal na aspeto ng pagsasanay — mula sa aktwal na pagkabit ng PV modules hanggang sa troubleshooting — sa ilalim ng mahigpit na pagbabantay at paggabay ng mga eksperto mula TESDA.

Bahagi ito ng mas malawak na adhikain ng TESDA na bigyan ng kakayahang teknikal at pagkakataong magkaroon ng sustainable na kabuhayan ang PDLs. Sa pagtatapos ng tatlong araw na pagsusuri, ihahain ang pinal na ulat na naglalaman ng resulta at rekomendasyon ng assessment.