Halika na, O Haliya
Hiling ko’y marinig nawa
Hinahanap ang hustisya
Hadlang sa ningning mong dala.

Halika na, O Haliya
Halimuyak ay hangyod na
Dugo at luha sa hawla
Halimaw na’ng sinasamba.

Halika na, O Haliya
Hagilapin – ‘di halata
Halimbukay, iragasa
Katapusan niya’y itakda.

Halika na, O Haliya
Hambalusin – Bakunawa
Handog ay awit ng lira
Hinahangad – pag-aalsa.

Halika na, O Haliya
Isiwalat ang hiwaga
Hagupitin hunyango niya
Himakas ang pagkahupa.

Halika na, O Haliya
Bigyang-hudyat ang paghinga
Mga hunghang – hatulan na
Silang hungkag, walang hiya.

Halika na, O Haliya
Tanging hiyas, aming diyosa
Laging sa’yo titingala
Kahanay ng mga tala.

Halika na, O Haliya
Haplusin ang aking diwa
Himutok ng nasa lupa
Inaapuhap – himala.

Halika na, O Haliya
Halimunmon ibalik na
Hagkan – anak ni Bathala
Katagpuin sarili niya.

Halika na, O Haliya
Ihanda aking hiraya
Hawakan ang kaluluwa
Himaton ko’y ihayag na.