Ako si Hannah, masunuring bata

Tinitimplahan ko si nanay ng tsaa

Niyayakap ko siya kapag may problema

 

Ngunit minsa’y timpla ay napapatamis ng lubha

Kaya minsan di’y may maririnig kang basag sa kusina

 

Ako naman si Ojie at mahilig akong magtagu-taguan

Nasanay nang magkumahog patungo sa loob ng kwarto

Upang makahanap ng sisingitan

 

Kaya sa ilalim ng kama mo ako matatagpuan

O di kaya’y sa likod ng kabinet o mga upuan

 

Ako naman si John, pero Jennifer na ang tawag sa akin

Bata pa lamang ako’y pintakasi na ng

Mahilig ako magpinta lalo na sa mukha

 

Subalit tahana’y puro bahid lamang ng pula

kaya’t mukha ko’y may permanenteng pintura

 

Ako si Angel, ang anghel ng aming tahanan

Dahil sa aking angking ganda ang lahat ay napapatanga

Subalit hindi ako kagaya ng anghel na walang bahid ng kasalanan

 

Pagkat araw-araw ay unti-unti akong nadadampian ng dungis

Hanggang sa wala nang matira kundi ang hubad na katotohanan

 

Ako si Jacob, sakitin at malamya

Pagdating sa bunong-braso ako ay bokya

Dahil dito’y pinagdidiskitahan ako ng aking mga kalaro

 

Kaya isang araw, sabi ni tatay ipapasyal niya lang daw ako

Subalit pagkagising ko ay nasa banyagang lugar na ako

Kapiling ang matandang lalaking nakangiti nang malaki

 

Ako naman si Ilona mula sa Pandacan

Kung saan walang ibang putahe kundi kanin at sandok

Laman ng tiyan ang baril at kutsilyong dagok

 

Tanging pag-asa ay ang bawat kayod ni tatay

At sa gabi, ang mabentang bangketa ni nanay

 

Kaming mga bata ang nakatira sa bahay ni Hudas

Nilinlang, sinaktan, at ipinamalas, kinalas

Hindi makahulog karayom o makabasag pinggan

 

Boses namin ay nakahimlay sa likod ng inyong isipan

Nagmamatyag, naghihintay na mahayag ang kasuwailan

 

Sa ilalim ng bubong ni Hudas kami’y pinagpipiyestahan

At pinaghuhuntahan ng matatabil nilang mga labi

 

At ang bawat salita ay gumuguhit na lamang sa lalamunan

Dahil sa bahay na ito matitikis ang magsasabi

 

Pagpasensiyahan mo na kung may kaganapang kasuklam-suklam

Subalit ito lamang ang maaabot ng iyong kaya

Ngunit sa bahay na ito, iyong matitikman

 

Ang hatol ng buhay at kamaralitaan

Dahil sa bahay ni Hudas mo mapagtatanto ang kasakiman

At ang mga sikretong tinitikis ng mga Hudas ng bayan