BALIK si Ceseal “Shaq” delos Santos bilang head coach ng University of Santo Tomas Golden Tigresses matapos ang 14 taon.

Sa isang anunsiyo ng paaralan noong Martes ng gabi, inihayag nito na papalitan ni Delos Santos si Emilio “Kung Fu” Reyes, na nagsilbing mentor ng koponan sa huling 10 taon.

“The University of Santo Tomas is pleased to announce the appointment of Cesael ‘Shaq’ Delos Santos as the new Head Coach of the Women’s Volleyball Team,” ayon sa social media post ng UST Institute of Physical Education and Athletics.

“We extend our gratitude to coach Kung Fu for his invaluable service to the team,” dagdag pa ng paaralan. “Let’s continue to support the Women’s Volleyball Team as they prepare for UAAP Season 88, which UST will host.”

Huling hinawakan ni Delos Santos ang Golden Tigresses noong 2011, isang taon matapos na igiya ang koponan sa huli nitong UAAP women’s volleyball championship noong Season 72.

Bukod sa pagiging head coach ng Golden Tigresses, kasalukuyan ding mentor ng Cignal HD Spikers si Delos Santos sa Premier Volleyball League (PVL).

Samantala, mananatili naman si Reyes bilang program director ng Golden Tigresses at head coach ng UST Junior Golden Tigresses team.

Tumapos ang Golden Tigresses na runner-up sa Season 87 noong nakaraang taon bago nagkasya sa bronze medal finish sa katatapos lamang na Season 88.