NAGNINGNING si Shevana Laput upang akayin ang De La Salle University Lady Spikers sa 19-25, 25-20, 25-21, 13-25, 15-5 panalo laban sa Adamson University Lady Falcons sa UAAP Season 88 women’s volleyball tournament kahapon sa SM Mall of Asia Arena sa Pasay City.

Nagpakawala ang Lady Spikers ng walong sunod na puntos sa deciding fifth set upang tuluyang mailayo ang laban at manatiling walang talo sa anim na laro (6-0), na naglalapit sa kanila sa first-round sweep.

Nanguna si Laput na may 26 puntos habang nagdagdag sina Angel Canino at Shane Reterta ng 19 at 10 puntos, ayon sa pagkakasunod, upang tulungan ang La Salle sa panalo.

Nagpalitan ng panalo ang dalawang koponan sa unang apat na set bago naging dikitan ang simula ng fifth set. Ngunit nagawang kontrolin ng La Salle ang laro matapos ang walong magkakasunod na puntos na nagtulak sa kanila sa komportableng 15-5 pagtatapos.

Samantala, bumagsak sa 3-3 kartada ang Adamson. Pinamunuan ni Frances Mordi ang Lady Falcons matapos umiskor ng 22 puntos.

Samantala, muling nakabalik sa panalo ang University of Santo Tomas Golden Tigresses matapos na igupo ang University of the Philippines Fighting Maroons, 16-25, 25-13, 25-19, 25-20.

Pinangunahan ni Angeline Poyos ang UST sa pagkamada ng 24 puntos mula sa 20 attacks, tatlong blocks at isang service ace. Nagtala rin siya ng pitong excellent digs at anim na excellent receptions upang tulungan ang Golden Tigresses na umangat sa 3-3 kartada.

Nag-ambag  si Regina Jurado ng 16 puntos habang may 12 puntos si Jonna Perdido. Nagbigay naman si setter Cassie Carballo ng 18 excellent sets bukod sa isang puntos, habang nagtala si libero Bernadett Pepito ng 15 excellent receptions at siyam na digs.

Matapos mabigo sa unang set, agad nakabawi ang UST sa ikalawang yugto kung saan kanilang dinomina ang laro. Napanatili ng Golden Tigresses ang momentum sa sumunod na dalawang set upang tuluyang makuha ang apat na set na panalo.

Sa panig ng UP, nanguna si Niña Ytang na may 14 puntos habang nagdagdag si Jelai Gajero ng 11. Nahulog sa 3-3 ang Fighting Maroons.