TATLONG graduates ng  Cagayan State University (CSU) Andrews Campus  sa Allied Health Sciences ang kabilang sa  national topnotchers sa katatapos na Medical Technologist Licensure Examination.

Batay sa inilabas na resulta ng Professional Regulation Commission o PRC, sa mga bagong rehistradong Medical Technologist, Rank 3 si Trina Orro Bernal na nakakuha ng 91.80% rating, Rank 5 si Precious Fernandez Tabbu na may 91.30%, habang Rank 9 si Angelica Mae Lizardo Balino na may 90.70%.

Nakapagtala rin ang CSU Andrews Campus ng 92.49% passing rate sa naturang board exam na ginanap noong  Marso.

Nabatid na 160 mula sa 173 examinees na graduate sa College of Allied Health Sciences ng CSU Andrews Campus ang matagumpay na nakapasa sa naturang pagsusulit.

Samantala, iniulat ng PRC na 6,147 sa 7,659 examinees sa buong bansa ang pumasa sa licensure examination kung saan naitala ang national passing rate na 80.26%.

Matatandaan na naging top 1 performing school ang CSU para sa respiratory therapist sa buong bansa matapos nitong maitala ang 100 percent passing rate kung saan mayroon itong 25 national toptochers nitong buwan ng Pebrero.