NANAWAGAN ang pamunuan ng Notre Dame of Tacurong College sa Sultan Kudarat sa kanilang mga mag-aaral sa mataas na paaralan na gumamit ng tunay na pangalan sa kanilang social media account.

Partikular na pinayuhan ang mga mag-aaral na nasa junior at senior class na opisyal nang nakatala sa nasabing paaralan.

Sa paggamit ng kanilang tunay na pangalan, partikular sa Facebook, matitiyak ang seguridad ng mag-aaral habang nagkaklase sa digital, ayon sa department head ng Junior-Senior Highschool.

Gagamitin din ang kanilang pangalan bilang opisyal na entry sa pag-access ng E-Learning at pagdalo sa klase.

Samantala, hinimok din ng paaralan ang kanilang mga estudyante na i-add ang opisyal nilang Facebook page para sa mabilis na pagpapalaganap ng impormasyon.